ILOILO CITY – Desidido ang Iloilo City Veterinary Office nga mahagan-hagan tubtub madula na ang stray dogs ukon layaw nga ido sa syudad sang Iloilo.
Sa programa Good Morning Philippines, ginpahayag ni Dr. Tomas Forteza, Iloilo City Veterinarian, suportado niya ang pagpatukod sang dog pound.
Suno kay Dr. Forteza, indi matuman ang nasambit nga handum kun indi magbulig ang barangay officials apang ang Iloilo City Veterinary Office gid magapanguna sa pagpatuman sini.
Ginpahayag Dr. Forteza nga sa masunod sa tuig, maga-umpisa na ang pagpatigayon sang training sa mga volunteer sa tagsa ka barangay tuhoy sa nagakaigo nga pagdakop kag pagsagod sang layaw nga ido.
Nagalaum ang natungdan nga suportahan sang barangay officials kag sang pumuluyo ang ginaduso nga responsible pet ownership agud nga madula na ang tuhoy sa nasambit nga problema.
