ILOILO – Hugot nga ginabalabagan sang isa ka grupo sang motorcycle drivers ang ginaduso ni Chief Presidential Legal Counsel Atty. Salvador Panelo nga dumilian ang riding-in-tandem ukon pag-angkas sa motorsiklo.
Sa exclusive interview sang Bombo Radyo kay Mr. Felix Serisola sang Red Riders sang Sta. Barbara, Iloilo, iya ginpahayag nga wala napaminsaran sang maayo ang nasambit nga proposal.
Suno kay Serisola, nagakadapat nga magkonsulta kuntani anay si Panelo sa mga motorista.
Indi dapat suno sa natungdan pagdalahigon ang tanan nga mga motorcycle drivers sa mga nagakatabo nga krimen nga ginakaulamiran sang riding-in-tandem.
Samtang, ginpamatukan man sang isa ka ordinaryo nga indibidwal nga nagasakay sa motorsiklo ang proposal ni Panelo.
Sa exclusive interview sang Bombo Radyo kay Just Villalobos sang Barangay Zamora St., Iloilo City Proper, iya ginpahayag nga nagakadapat ginahibalo anay ang sitwasyon antes ginduso ni Panelo ang pagdumili sa pag-angkas sa motorsiklo.
Suno kay Villalobos, pinaglagpat ang nasambit nga proposal sa diin wala daw kaangay nga wala ini ginpanumduman sang maayo.
Gin-athag man sang natungdan, nga indi tanan nga naga-angkas ang malain nga tawo.
Panugyan ni Villalobos, mas maayo nga hugtan nalang ang ginapatigayon nga checkpoint sa diin isa ini ka maayo nga tikang agud madakpan ang mga riding-in-tandem hitmen.
