ILOILO – Nagalalain ang mga ordinaryo nga motorista sa proposal ni Chief Presidential Legal Counsel Atty. Salvador Panelo nga dumilian ang riding-in-tandem ukon pag-angkas sa motorsiklo.
Sa interview sang Bombo Radyo kay Alexander Empasta, residente sang Barangay Poblacion, Badiangan, Iloilo kag nagabyahe sang habal-habal sa nasambit nga banwa, iya ginpahayag nga dako nga huol sa ila ang nasambit nga proposal.
Suno kay Empasta, 10 na siya ka tuig nga nagabyahe sang habal-habal sa diin nagin dako ini nga bulig agud mapaeskwela niya ang iya duha ka mga kabataan.
Ginpahayag sang natungdan nga madulaan sila sang pangabuhian sa tion nga mapatauman ang pagdumili sa pag-angkas sa motorsiklo.
Nagalaom man ang natungdan nga intindihon sila sang gobyerno ilabi na subong sa tion sang pandemya.
