ILOILO CITY – Indi lamang ang sektor sang transportasyon ang apektado kundi lakip man ang ekonomiya kun dumili-an ang pagbyahe sang tricycle sa national road.
Ini ang pahayag ni Iloilo City Mayor Jerry Treñas may kaangtanan sa nasambit nga mandu sang Department of Interior and Local Government.
Sa interview sang Bombo Radyo kay Treñas, iya ginpahayag nga may yara sang negatibo nga epekto ang nasambit nga mandu bangud nga kun binag-binagon, indi tanan nga barangay sa syudad sang Iloilo ang mahimo nga maagyan sang Public Utility Jeepney.
Ginhalimbawa ni Treñas amo ang Brgy. Rizal sa La Paz kag Rizal Street sa City Proper lakip na ang ruta halin sa SM City padulong sa Brgy. Bakhaw kun sa diin, ang tricycle gid lamang ang maka-agi sa nasambit nga ruta.
Bangud sini, ginpahayag sang alkalde nga luyag niya nga makigsapol kay Public Safety and Transportation Management Office Head Jeck Conlu agud nga maistoryahan ang tuhoy sa tricycle route plan apang sa subong, wala pa sang petsa kun san-o patigayunon ang pagsinapol.
Ginpahayag ni Iloilo City Councilor Romel Duron nga tubtub subong, wala pa sa gihapon natapos ang Local Public Transport Route Plan.
Suno kay Duron nga chairman sang Committee on Transportation, indi madali-dali ang pagbalay sang route plan bangud nga nagakinahanglan pa ini sang pondo para makapatigayon sang survey kag antes makapili sang survey firm, may yara anay sang bidding nga patigayunon.
Sa pagpaathag ni Duron, halos tanan nga sahi sang transportasyon magluwas sa Taxi ang makabenepisyo sa nasambit nga route plan.
