ILOILO – Nagakinahanglan sang mas masangkad nga kampanya agud nga matuman ang ‘sustainbale green governance’ ukon ang pagpahagan-hagan sang plastic nga basura.
Ini ang katuyu-an sang youth leader nga si Adrian Santuyo Camposagrado sa paglunsyar sang ‘eSTRAWnghero’ nga isa ka kampanya agud nga madula ang single-use plastic kasubong sang drinking straw.
Sa interview sang Bombo Radyo kay Camposagrado, chairperson sang University Student Council sang University of the Philippines Visayas, iya ginpahayag nga sa amat-amat, mahagan-hagan kag madula na ang paggamit sang single-use plastics.
Kun pasapayan ang paghaboy sang mga single-use plastic kasubong sang drinking straw suno kay Camposagrado, mahimo ini nga mangin tunaan sang pagkaguba sang dunang manggad.
Ginhalimbawa ni Camposagrado nga sa baylo nga maggamit sang plastic straw, mas makapaayo nga maggamit sang alternatibo kasubong sang glass, metal ukon bamboo straw
apang mas makapaayo pa gid kun likawan na lang ang paggamit sang drinking straw.
Sa subong suno sa natungdan, ang nasambit nga kampanya ang ginapatuman na sa mga eskwelahan sa Tigbauan, Iloilo kag amo man sa mga kalan-an sa syudad sang Iloilo.
Sa bulig sang Department of Environment and Natural Resources,ginpahayag ni Camposagrado nga ila na lang nga ginahulat nga matapos sa pag-imprinta ang libro tuhoy sa nasambit nga kampanya agud nga mapahangop ang mga estudyante.
Nagalaum si Camposagrado nga mapatuman man ang nasambit nga kampanya sa iban pa nga lugar sa pungsod.
