May mga kaso nga dalayon na lang nga nagakatulugan… malubong na lang sa limot apang wala pa gihapon nahatag ang hustisya.
Apang may mga kaso man nga kaangay sining natabo sa Estados Unidos sang Amerika kun sa diin malapit na lang dalayon masolbar ang isa ka murder case nga natabo sang 1988 ukon 36 anyos na ang nagligad.
Kaso ini sang 27-anyos nga babaye nga si Karen Taylor, residente sang Roxbury sa Boston, U.S.A.
Sang Mayo 1988, nagtawag ang iya iloy sa ila apartment, apang ang tatlo ka tuig nga bata ni Karen ang nakasabat kag nagpanugid nga nagakatulog ang iya mama kag indi niya ini mapukaw.
Sang ginkadtuan ang apartment, nakit-an ang lawas ni Karen nga nagahamyangon, nagapaligo sa kaugalingon nga dugo, kag may 15 ka mga pilas tuga sang pagkabuno partikular na sa iya ulo, dughan, kag liog.
Ang suspek nga naangot sa krimen amo ang lalaki nga si James Holloman.
Sang tion nga nakit-an ang biktima, nakit-an man didto ang cheke nga nakapangalan kay James.
May “scrapings” man sa kuko sang biktima, may duguon nga sweatshirt malapit sa lawas sini, kag may upos sa sigarilyo sa banyo.
Ginkulang sang forensic evidence gani nga bitin ang pag-link kay James sa pagpapatay kay Karen.
Apang nakakuha ang pulis sang DNA sa mga ebidensiya, gani na-profile sang mga pulis ang posible nga killer.
Abi sang tanan, malipatan na lang ang kaso, kag mangin si James ang wala nagdumdom nga mabuhi pa liwat ang amo nga istorya.
Sang nagligad nga tuig, sa isa ka simple nga adlaw, nagdupla siya sa guwa sang ila balay sa Boston, apang likom sa iya ihibalo, may mga operatiba nga nagkuha sang sample sa amo nga dupla kag ginpaidalom sa DNA test.
Ini nga sample ang nagsanto gid sa DNA nga didto naman nakuha sa kuko sang biktima, kag nag-match man sa duguon nga sweatshirt kag sa upos sang sigarilyo sa banyo.
Sang September 19, gindakop si James, ginpatigayon ang hearing, ginkasuhan ini sang first-degree murder, kag gin-detain nga wala sang piyansa.
Naka-schedule ang masunod nga hearing sa korte sa October 29, 2024.
Kumpyansa ang kampo sang suspek nga subong nagaedad na sang 65-anyos nga indi siya madutlan sa kaso.
Ginpabugal naman sang Suffolk County District nga isa ini ka ehemplo sang dalayawon nga investigative work sang detectives kag prosecutors gamit ang modern criminology science.
Labaw sa tanan suno sa district, isa ini ka oportunidad para sa mga himata sang biktima nga makit-an nila nga may manabat sa krimen kag mahatag na gid man ang hustisya apisar malapit apat ka dekada na ang nagligad.#
