ILOILO CITY – Ginhingadlan sang pageant blogger nga si Norman Tinio ang iya mga ‘hot picks’ sa kun sin-o ang nagakadapat nga makakuha sang korona sa Binibining Pilipinas 2019.
Sa interview sang Bombo Radyo kay Tinio, iya ginpahayag nga ang iya ginpili nga mga kandidata ang nag-agi sa maid-id nga pagbinag-binag.
Wala man sa pagpabugal suno kay Tinio apang makapila na niya ka beses nga napakot kun sanday sin-o ang mangin tiglawas sang Pilipinas sa Miss Universe.
Pila lamang diri amo sanday Miss Universe 2018 Catriona Gray, Miss Universe 2015 Pia Wurtzbach kag Miss Universe 2016 Top 6 Maxine Medina.
Sa pagpaathag ni Tinio, ang tagsa ka titulo ang may kaugalingon man nga criteria sa pagpili sang nagakadapat nga kandidata.
Sa Miss Grand International, mas ginpaboran ni Tinio si Gazini Ganados sang Cebu bangud sa pila ka mga rason.
Sa Miss Globe, duha ka kandidata ang ginapili-an ni Tinio kag ini amo sanday Ilene De Vera sang Cebu kag Leren Mae Bautista sang Laguna.
Sa duha ka kandidata, mas nagpangibabaw si Bautista nga nakahatag na sang international title para sa Pilipinas.
Nagakinahanglan naman nga isa ka ‘performer’ ang magadaog sa Miss Supranational sa diin para kay Tinio si Emma Tiglao sang Pampanga kag Samantha Bernardo sang Palawan ang maga-agaway sa nasambit nga korona.
Sa pihak sini, mas nagpangibabaw si Tiglao para kay Tinio samtang si Bernardo naman ang nagakabagay para sa Miss Intercontinental sa diin ang pinay nga si Karen Galman ang naga-uyat subong sang korona.
Nagakinahanglan naman nga may yara sang ‘doll face’ ukon may yara sang hitsura kasubong sang monyeka ang nagakadapat nga magdaug sa Miss International.
Lakip sa mga ginapili-an ni Tinio nga magadaug sa Miss International amo sanday Vickie Rushton sang Negros Occidental kag Hannah Arnold sang Masbate.
Kun papilion si Tinio, mas paboran niya si Rushton nga ‘repeater’ sa Binibining Pilipinas bangud sa iya manami nga ‘smile’ ukon kadlaw.
Para naman sa Miss Universe, madamu sang ginapili-an si Tinio kag nalakip diri amo sanday Julia Saubier sang Bicol Region kag Bea Patrica Magtanong sang Bataan.
Ang duha ka kandidata suno kay Tinio ang lunsay maanyag kag may yara sang maayo nga communication skills nga kinahanglan sang isa ka Miss Universe apang kun papili-on si Magtanong ang nagakadapat nga mangin masunod nga Miss Universe.
