ILOILO CITY – Gin-athag sang Department of Health nga mahimo gamiton sa pagsakay sa tanan nga public transport ang Foam Garterized Face Shield ukon ang Eyeglasses Face Shield.
Ini ang kasunod sang pagsalangisag nga natuga sang ginpaguwa nga guidelines sang Department of Health may kaangtanan sa kun ano nga sahi sang face shield ang dapat gamiton epektibo buwas nga adlaw, Agosto 15.
Sa interview sang Bombo Radyo kay Dr. Marie Jocelyn Te, COVID-19 spokesperson sang Department of Health Region 6, iya ginpahayag nga santo sa guidelines, dapat ang face shield ang nagatabon sa bug-os nga guya.
Yari ang specifications nga ginapanugyan sang ahensya:
-Himo sa plastic ukon acetate material, mahapos tinlu-an, nagahatag sang good visibility, fog resistant, may adjustable band agud mag-fit sa ulo kag agtang.
Gin-athag ni Te nga acceptable man ang iban pa nga sahi sang non-medical grade face shield para sa community use apang wala diri nalakip ang eyeshield ukon visor-type bangud nga mata lamang ang ginatabunan sini.
Magluwas sa face shield, kinahanglan man nga magsuksok sang face mask ilabi na kun yara sa pampubliko nga lugar.
