PAVIA, ILOILO – Makatuga sang arikis, rashes kag iban pa nga sahi sang skin diseases ang paggamit sang lubog kag mabaho nga tubig.
Ini ang pahayag sang Medical expert nga si Dr. Elvin Tiangha may kaangtanan sa problema sang mga residente sang Deca Homes subdivision sa Pavia, Iloilo tuhoy sa mahigko nga tubig nga gina-supply sang BP Waterworks Inc.
Suno kay Dr. Tiangha, maathag nga kontaminado ang tubig sa tion nga may yara na ini sang baho, lain nga sabor kag kun indi matin-aw.
Ginpahayag ni Dr. Tiangha nga ang kontaminado nga tubig ang tuman ka delikado ilabi na sa mga lapsag nga 6 ka bulan panubo kag sa mga babayi nga nagabusong.
Ang tubig suno sa natungdan ang tuman ka importante sa kabuhi sang isa ka tawo kag agud nga masigurado nga potable water ang gina-supply sang water distributor, ginakinahanglan ang pagpatigayon sang regular nga water quality test.
Agud nga masigurado, ginapanugyan ang pagpatigayon sang daily bacteria, taste, color kag odor test.
