ILOILO CITY – Hugot ang panindugan sang Commission on Human Rights nga limitado lang sa nakabutang ang layi ang mahimo mapatuman sang otoridad kun sila ang nagasaway sa mga nagalapas sa mga protocols batok sa COVID-19.
Sa interview sang Bombo Radyo kay Atty. Jonnie Dabuco, director sang Commission on Human Rights Region VI, iya ginpahayag nga wala nakabutang sa layi nga pwede ang pagbakol gamit ang rattan stick ukon yantok ukon anuman nga stick.
Ini ang pahayag ni Dabuco kasunod sang kontrobersyal nga statement ni Joint Task Force COVID Shield commander Police Lt. General Cesar Binag nga magalibot ang mga pulis sa pampubliko nga lugar dala ang ila nga stick agud nga ma-check ang physical distancing sang mga tawo.
Ang penalidad nga nakabutang sa layi suno sa natungdan amo ang pagmulta kag pagpasaka sang kaso.
Nagapati man si Dabuco nga madali tudluan ang mga Pinoy kag madala man sa pahanumdom.
Kun may mga salawayon gid suno sa iya, dapat nga ipaagi sa husto nga proseso.
Gindayaw man ni Dabuco ang una nga desisyon sang Iloilo City Government nga gindala sa malapad nga area ang mga quarantine violators kag didto ginpatigayon ang lecture kag may yara man sang ginpatigayon nga community service.
Ang ginalikawan gid suno kay Dabuco amo nga mahuy-an ukon matrauma ang sin-o man nga violator nga mapatup-an sang stick.
Kun ibase sa layi suno sa natungdan, pwede gid makareklamo ang mabakulan.
Una na nagpagwa sang statement ang Commission on Human Rights Central Office nga ang paggamit sang “yantok” ukon rattan sticks ang indi nagakaigu bangud isa ini ka porma sang kalakasan.
Nagdepensa man ang Joint Task Force COVID Shield ang ila gamiton nga stick ang magaserbe lamang nga self defense bangud suno sa commander nga si Binag, sa masobra 598,000 nga quarantine protocol violators, ginabanta 2,000 ang gin-aresto bangud sang direct assault sa law enforcers.
