May yara sang paathag kun ngaa naggasto ni Vice President Sara Duterte ang P125-million nga confidential funds sang Office of the Vice President (OVP) sa sulod lamang sang 11 ka adlaw sang Disyembre 2022.
Ini ang pahayag sang defense counsel kag spokesperson nga si Atty. Michael Poa kun ngaa wala wala anay sila nag-ugyon sa stipulation sa impeachment trial kahapon, Agusto 3, kadungan sang presentation ni House private prosecutor Lorna Kapunan.
Ang stipulation amo ang “admissions of facts” kag mga dokumento agud nga indi na magpresentar sang indi naman kinahanglanon nga mga ebidensya. Ginahimo ini sa korte agud nga makakinot sang tyempo sa trial kag likawan na ang indi naman kinahanglanon nga mga diskusyon.
Suno kay Poa, luyag anay sang depensa nga mahatagan sila sang higayon nga mapahayag ang ila bahin kag ma-cross examine ang mga isyu may kaangtanan sa paggamit sang confidential funds.
“Sa atin ‘yung 11 days kasi may mga explanation ‘yan. May maari tayong gawin na cross diyan so hindi pa muna tayo pumayag sa stipulation,” pahayag sang counsel.
Ginpahayag sini nga nag-ugyon man ang kampo sang depensa nga mag-stipulate sa pila ka mga dokumento nga ginsumiter sa Commission on Audit ukon COA lakip ang iban pa nga records.
Sa trial kahapon, ginpresentar bilang witness sang prosekusyon si Roderick Wamil, former state auditor sang Commission on Audit – Intelligence and Confidential Funds Office (COA-ICFAO).
Pahayag ni Poa, wala na sila nakibot sa iya nga testimoniya.
“Wala naman po dahil sa aming pananaw, ‘yan naman na ang lumabas sa COA findings. Pina-identify lang naman sa COA kung ano ‘yung kanilang naging findings so kumbaga, nothing we haven’t read before,” dugang sini.#
