MANILA – Ginpanawagan ni Presidente Rodrigo Duterte sa mga dalagku nga kompaniya nga ihatag na ang 13th month pay sang mga empleyado ilabi na ang mga yara sa Luzon kasunod sang deklarasyon nga ipaidalom sa enhanced community quarantine ang lugar bangud sa Coronavirus Disease 2019 (COVID-19).
Sa iya mensahe sa Malacañang, ginpahayag ni Presidente Duterte nga ginakinahanglan sang mga empleyado ang 13th month pay ilabi na sa tion nga may yara sang krisis.
Suno kay Presidente Duterte, bisan katunga na lang sang 13th month pay ang mabaton sang mga empleyado agud nga sila ang may inuggasto sa pagbakal sang kinahanglanon kasubong sang pagkaon kag bulong.
Ang temprano nga paghatag sang bonus suno sa presidente ang pagpakita sang pagpakig-unong ilabi sa mga empleyado nga nadulaan sang trabaho bangud sa nasambit nga virus.
Magluwas sa bonus, ginaduso man sang natungdan ang pagpatuman sang flexible arrangements kag paghatag sang dugang nga benepisyo sa mga empleyado sa gobyerno ukon pribado man nga sektor.
