MANILA – Tama ka importante ang paghatag sang emergency powers kay Presidente Rodrigo Duterte agud nga mapadali ang pagtapna sang Coronavirus Disease 2019 (COVID-19).
Ini ang pahayag ni Iloilo 2nd District Rep. Michael Gorriceta, matapos nga gin-aprobahan sang Kongreso ang hagna nga nagahatag sang gahum sa presidente nga mag-exercise sang iya kinamatarong apang may yara sang restrictions.
Sa interview sang Bombo Radyo kay Gorriceta, iya ginpahayag nga kinahanglan nga magbuligay ang tanan agud madasig nga matapna sang COVID-19 pandemic ilabi pa nga kada adlaw, nagadugang ang mga pasyente nga nagpositibo sa nasambit nga virus.
Suno kay Gorriceta, matapos napasar ang hagna, mahatagan sang dugang nga Personal Protective Equipment kag allocations ang frontliners kag mahatagan man sang bulig ang mga apektado nga residente.
Ginpahayag ni Gorriceta nga apisar may yara sang nagkalain-lain nga bersyon sang hagna ang Kamara kag Senado apang ila nadesisyunan nga maghugpong agud nga mapadasig ang paghatag sang emergency powers sa Presidente.
Nahibalu-an nga sakop sang emergency power nga ginhatag amo ang pagmandu sang Presidente sa operation sang privately-owned hospitals, medical and health facilities, hotels kag mga pasilidad nga nagaserbe nga quarantine areas, medical reliefand aid distribution locations lakip na ang temporary medical facilities.
Sakop man ang operation sang public transportation systems nga mahimo magamit sang health, emergency, frontline personnel kag mga pasahero.
May yara man sang kinamatarong ang Presidente sa pag reprogram, pag reallocate kag pag realign sang appropriation sa 2020 national budget nga pagagamiton sa pagtapna sang COVID-19.
