ILOILO CITY – Daku nga pagpanghangkat para sa gobyerno ang paghatag sang epektibo nga edukasyon apisar nga wala na sang face-to-face interaction bangud sa Coronavirus Disease 2019 (COVID-19).
Sa Good Morning Philippines program, ginpahayag ni Dr. Rex Sadaba, Professor sang University of the Philippines – Miagao, nga indi mahapos ang pagpatuman sang panibag-o nga class format bangud nga ini ang nagakinahanglan sang pagtuon.
Suno kay Sadaba, sa bahin sang Commission on Higher Education, ginaduso ang flexible learning para sa college students kag kabahin diri amo ang distance learning kag blended learning nga pabor para sa mga estudyante kun sa diin may yara lang sang deadline para sa activities.
Sa bahin sang distance learning, ginpahayag ni Sadaba nga ini ang ginapaagi sa online samtang ang blended learning naman ang kombinasyon sang online kag face-to-face classes.
Magluwas diri, may yara pa sang nanari-sari nga pamaagi sa blended learning apang ang common lamang nga problema sini sa distance learning amo nga dapat user-friendly kag available online ang tanan nga course materials.
Ang kinahanglan sa subong suno sa natungdan amo nga ipaathag sa tanan kun ano ang kinalain sang tagsa ka learning strategy agud nga mas mahapos para sa mga estudyante ang pagpili sang kurso kag kun ano nga sahi sang flexible learning ang kuhaon.
