ILOILO CITY – Daku ang mabulig sa paghibalo sang history ukon maragtas sang Pilipinas sa pagkatawo sang tagsa ka Filipino.
Ini ang pahayag ni Prof. Rey Carlo Gonzales, history professor sa University of the Philippines Visayas, kadungan sang nagahilapit nga Independece Day ukon adlaw sang kahilwayan sa Hunyo 12.
Sa pagpaathag ni Prof. Gonzales paagi sa Bombo Radyo, kun wala ang maragtas, wala man sang buwas damlag ang Pilipinas kag wala naaguman sang mga Filipino ang kahilwayan subong.
Ang isa ka tawo ang makilala suno kay Prof. Gonzales paagi sa iya istorya ukon sahi sang pagpangabuhi.
May kaangtanan diri ang mga historian suno kay Prof. Gonzales ang may yara sang kaugalingon nga bersyon sa maragtas kasubong na lang sa Pilipinas.
Ginhalimbawa ni Prof. Gonzales ang tuhoy sa pagsaulog sang Pilipinas sang Independence Day ukon Adlaw sang kahilwayan.
Ang mga ginbun-ag humalin sang 1962 suno kay Prof. Gonzales ang nakamuklat nga sa adlaw sang Hunyo 12 ginasaulog ang Independence Day apang sa likod sini, madamu sang pagbais tuhoy sa matuod nga adlaw sa pagsaulog sang nasambit nga selebrasyon.
May yara sang nagahambal suno sa manunudlo nga Hulyo 4 samtang may yara naman sang nagahambal nga Hunyo 12 apang ang matuod diri amo nga nakadepende sa mga Filipino ang paghangop tuhoy diri.
Una nga ginduso sang mga Amerikano nga sa Hulyo 4 saulogon ang kahilwayan sang Pilipinas dungan sa Independence Day sang Estados Unidos.
Mas ginpili sang mga Filipino nga saulogon ang Independence Day sa Hunyo 12 bangud sa nasambit nga adlaw natabo ang political move ni anay Presidente Emilio Aguinaldo kag ang pag-umpisa sang rebolusyon sa pagpamuno ni Andres Bonifacio.
Bisan pa nga wala nagmadinalag-on, apang ini ang makabig nga pinakamaragtason nga adlaw nga simbolo sang pagkaisog sang mga Filipino.
Ginakabig sang Filipino nga kadalag-an ang pagpakigbato bisan pa nga nalutos sa kamot sang mananakop ipaanggid sa Hulyo 4 nga kasubong nga ginhatagan lang sang Estados Unidos sang kahigayunan ang Pilipinas nga maka-angkon sang kahilwayan.
