ILOILO CITY – Wala sang dapat kahangaw-an ang mga pumuluyo sa syudad sang Iloilo tuhoy sa plano nga himuon nga isolation area ang isa ka building sang Ateneo de Iloilo.
Sa interview sang Bombo Radyo kay Iloilo City Mayor Jerry Treñas, iya ginpahayag nga amat-amat na nga nagakabuta ang Iloilo Central School bangud nga nagadamu ang Persons Under Monitoring kag Persons Under Investigation.
Suno kay Treñas, indi dapat pagkahangaw-an ang posibilidad nga maglaptaang virus kundi dapat nga kahangaw-an ang nagataas nga numero sang mga nakitaan sang sintomas sang Coronavirus Disease 2019 (COVID-19).
Ginpahayag ni Treñas nga kun wala sang isolation area, mas madasig nga maglaton kag maglapta ang virus.
Indi bastante suno kay Treñas ang 100,000 ka bilog nga COVID-19 test kits sa Western Visayas.
Sa pagpaathag ni Treñas, ang resulta sang COVID-19 test kits lamang ang mangin source sang impormasyon kun bala positibo ukon negatibo sa virus ang pasyente.
Agud nga mas madamu pa ang mapaidalom sa medical examination, kinahanglan nga dugangan ang available nga test kits.
