ILOILO CITY -Pamulitika ang motibo sang paghingadlan ni Iloilo City Mayor Jose Espinosa III sa duha ka mga Punong Barangay sa syudad nga amo ang utok sa ginapahayag kilkilanay nga nagakatabo sa Iloilo Terminal Market.
Ini ang nangin reaksyon ni Punong Barangay Alain Rey Depatillo sang Rizal Pala-Pala 1, Iloilo City matapos nga naulamid sila ni Punong Barangay Noel Soliman sang Rizal Pala-Pala 2, Iloilo City sa ginapahayag ‘sindikato’ sa nasambit nga merkado.
Sa interview sang Bombo Radyo kay Depatillo, iya ginpahayag nga wala sang kamatuoran ang pahayag ni Mayor Espinosa batok sa ila ni Soliman.
Wala na sang may naisip nga motibo si Depatillo magluwas sa pulitika bangud nga ila ginasuportahan si Iloilo City Cong. Jerry Treñas nga mangin kasumpong ni Espinosa sa pagka-alkalde sa May midterm elections.
Sa pagkamatuod suno sa Punong Barangay, kilala sila nga supporters ni Espinosa sadto apang subong nagdesisyon sila nga magsaylo sa kampo ni Treñas.
Mahimo suno sa natungdan nga nagabalos lang si Mayor Espinosa rason nga ginapatu patu-an sila ni Soliman.
