ILOILO CITY – Mas nagdasig ang paghitso sang mga pending nga kaso sa National Police Commission.
Sa interview sang Bombo Radyo kay Atty. Rutchel Espinosa, summary hearing officer sang National Police Commission 6, iya ginpahayag nga naglab-ot na lang sa 11 ang pending cases nga ginakaulamiran sang mga pulis.
Suno kay Espinosa, nagdasig ang paghitso sang mga kaso bangud man sa memorandum nga ginasunod sang National Police Commission nga nagamandu sang mas madasig nga hearing.
Ginpahayag ni Espinosa nga sa subong, pagkatapos sang preliminary conference, ginapapasa ang magtimbang nga bahin sang position paper kag gilayon nga ginabasura ang kaso kun wala sang substancial evidence batok sa akusado.
Suno kay Espinosa, kun may yara sang reklamo batok sa isa ka pulis, ginapapasa sang explaination letter ang akusado indi
kaangay sang una nga wala na ginapapasa ang akusado kun may yara man lang sang substancial evidence.
Magapadayon lamang ang kaso suno sa natungdan kun makitaan ini sang probable cause.
Samtang, suno naman kay Atty. Rodney Zaragoza, Assistant Regional Director sang National Police Commission 6, lunsay administratibo ang kaso nga gina-uyatan sang ahensya.
Ginpahayag ni Zaragoza nga sa paghitso sang kaso administratibo, wala sang full blown trial nga matabo kasubong sa paghitso sang kaso kriminal.
Sa pagpaathag ni Zaragoza, ang quantum of evidence sa kaso administratibo amo ang subtancial evidence kasubong sang authenticated affidavit, police blotter kag result of investigation samtang ang kaso kriminal naman ang maga-agi sa full blown trial.
Daku ka tama suno sa natungdan ang kinalain sang proseso sa pagsolbar sang kaso adminsitratibo ipaanggid sa kaso kriminal.
