ILOILO CITY- Ginatugyan na sang Archodiocese of Jaro sa mga kura paroko sa mga parokya ang desisyon kun hiwaton sa gym sa baylo nga sa simbahan ukon chapel ang misa may kaangtanan sa pagsugod sang simbang gabi.
Sa interview sang Bombo Radyo kay Rev. Fr. Angelo Colada, director sang Commission on Social Communications kag spokesperson man sang Archdiocese of Jaro, iya ginpahayag nga bangud ginalauman nga madamo ang magatambong sa misa, indi maakomodar sang mga kapilya ang kadamuon sang sumilimba.
Suno kay Father Colada, kun may mga gym sa barangay, mas maayo nga diri nalang hiwaton ang misa agud mas madamo ang makatambong kag mas mapatuman ang physical distancing.
Samtang, ginpaathag naman ni Father Colada ang kinalain sang misa sa gab-i kag misa sa kaagahon.
Suno sa pari, ang misa sa gab-i ang ginatawag nga mass of waiting ukon simbang gabi samtang ang misa naman sa kaagahon amo ang Aguinaldo mass.
Pahayag sang natungdan, bangud sa pandemya,ang Aguinaldo mass sa 4:30 sa kaagahon ang ginasugpunan sang mass of the day sa alas-sais sa aga agud ma-cater ang mas madamo nga sumilimba.
Gindugang naman ni Colada nga pwede sa gihapon makambyo ang pagtambong sa misa sa diin sa baylo nga sa kaagahon, sa gab-i nalang himuon ang pagsimba agud malikawan ang pagginutok.
