Gin-dismiss sang Korte ang pagka-alkalde ni Alice Guo matapos magpagwa sang desisyon si Judge Liwliwa S. Hidalgo sang Manila Regional Trial Court (RTC) Branch 34 sang Hunyo 27, 2025.
Ginpaboran sang korte ang quo warranto petition nga ginpasaka sang Office of the Solicitor General batok kay Guo.
Madumduman nga ginbuyagyag ni Senator Risa Hontiveros sa isa ka Senate inquiry nga natukiban sang National Bureau of Investigation (NBI) nga si Guo Hua Ping kag si Alice Guo ang may kaangay nga fingerprints, apang ang ila relasyon sa isa kag isa ang ginpanginwala sang abogado sang na-dismiss nga Bamban mayor.
Ginpahayag pa sang korte nga pareho nga mga Chinese citizens ang ginikanan ni Guo, gani wala siya sang legal nga basehan nga magpakilala bilang Filipino. Ang iya Philippine passport kag birth certificate ginbaliwala sang korte bilang ebidensya sa iya pagka-Pilipino.
Suno sa korte nga ang iya mga ginikanan nag-abot sa Pilipinas halin sa Fujian, China sang Hulyo 12, 1999, kag wala sang ebidensya nga nag-agi sila sa legal nga proseso para mangin Filipino citizens.
Ginpunto sang desisyon nga ang iya pagka-alkalde “void ab initio” ukon wala sang bisa halin pa sa umpisa.
Ginklaro man sang korte nga apisar pa nga siya naproklamar kag nanumpa sa puwesto, wala ini sang epekto bangud diskwalipikado siya sa pagka-kandidato pa lang.
Matandaan nga sang Agusto 2024, ginmanduan sang Office of the Ombudsman ang iya dismissal bangud sa pagkalakip sini sa Philippine Offshore Gaming Operators (POGO).
