ILOILO CITY – 34 ka mga alkalde sa Probinsya sang Iloilo ang nagpirma agud makakas sa katungdanan si Dr. Ma. Luz De Los Reyes bilang Schools Division Superintendent sa probinsya sang Iloilo.
Mayo 15, 2023, ginmando ni Department of Education Undersecretary Atty. Revsee Escobedo ang pagkakas kay De Los Reyes sa katungdanan kag ginbalik liwat bilang Division Superintendent sang Division of Iloilo City.
Sa interview sang Bombo Radyo kay Mayor Rosario Mediatrix “Trixie” Fernandez sang banwa sang San Enrique kag League of Municipalities of the Philippines- Iloilo Chapter President, iya ginpahayag nga nangin matinaas-taason si De Los Reyes sa ginpatigayon nga pagsinapol kaupod sang iban nga mga alkalde sa probinsya.
Matandaan nga sang Pebrero 2023, nagpatigayon sang pagsinapol ang mga alkalde kaupod sang mga opisyales sang Department of Education kun sa diin nagpamangkot si Santa Barbara Mayor Dennis Superficial angot sa pagpatigayon sang Congressional District Sports Association Meet (CDSA), apang nagagwa nga daw gindudahan si De Los Reyes, rason sang indi manami sini nga aktwasyon.
Sa matuod-tuod suno kay Fernandez, luyag niya kuntani nga mas magpangibabaw ang ‘mutual respect’ apisar alkalde ukon simple nga manugpangisda lang — isa ka bagay nga wala si De Los Reyes.
Ginpahayag dugang sang natungdan nga bangud sa pagtratar kag indi manami nga komunikasyon sa tunga sang mga alkalde kag sang opisyal, tuman ka dismayado ini.
Para kay Fernandez, kun papilion, mas manami kuntani kun may maayo nga relasyon ang Department of Education kag mga Local Government Units sa probinsya sang Iloio bangud isa lamang ang katuyuan sang mga ini — ang mag-serbisyo sa mga pumuluyo.
