ILOILO – Indi matumod sang Department of the Interior and Local Government Unit kun ano nga ahensya sa national level ang nagahatag sang pahanugot sa pagpauli sang tuman ka damo nga Locally Stranded Individual.
Ini ang paathag ni Iloilo Provincial DILG Officer Teodora Sumagaysay may kaangtanan sa problema sa kakulang sang koordinasyon tuhoy sa byahe sang returning residents halin sa Metro Manila.
Sa interview sang Bombo Radyo kay Sumagaysay, iya ginpahayag nga kun kaisa, indi man malikawan nga maatrasar ang pagsugat bangud nga ang iban nga Local Government Unit ang kulang sa logistics kag kun sala ang detalye nga ginahatag sang Locally Stranded Individual.
Suno kay Sumagaysay, gilayon nga ginapahibalo ang tagsa ka Local Government Unit sa tion nga may impormasyon nga ginapalab-ot sa Provincial level sang Department of the Interior and Local Government Unit agud nga wala sang mangin problema.
Ginpahayag ni Sumagaysay nga sa iya nga pagkahibalo, ang Department of Transportation amo ang nagahatag sang go signal sa shipping company nga makabyahe samtang ang Philippine Coast Guard naman ang nagapahibalo tuhoy sa manifesto.
Bisan siya suno sa natungdan ang natingala man kun nga-a tuman ka damo ang nagapauli nga Locally Stranded Individual nga rason sang pagginutok sa mga quarantine facilities apang ang nasambit nga problema ang indi ma kontrol sang regional level.
Humalin sang Hulyo 18, regular na ang commercial trip sang barko kun sa diin sakay ang mga Locally Stranded Individual halin sa Metro Manila.
Subong nga gab-i, Hulyo 20, naglab-ot sa 207 nga Locally Stranded Individuals ang nag-abot sa Iloilo.
