Ginaplano sang Iloilo City Government nga pangkakson ang mga spaghetti wires halin sa Plazoleta Gay padulong sa Iloilo Provincial Capitol.
Sa interview sang Bombo Radyo kay Iloilo City Councilor Miguel Treñas, iya ginpahayag nga nasugodan na man ang pagbaklas sang mga wires sa Calle Real, kon sa diin, para sa natungdan, tion na man para kakson man ang mga spaghetti wire sa pila ka dalan sa syudad.
Suno kay Treñas, ang tikang ang lakip man sa ordinansa sang syudad nga underground cabling.
Ginpahayag man sini nga indi lamang ang mga dalan kundi pati man ang kabug-usan nga mga public plaza sa syudad ang ipaidalom sa amo nga tikang.
Ginpunto man sang natungdan ang katinlo nga nahatag sang underground cabling sa syudad.
Ginalantaw man ni Treñas ang mangin koordinasyon sang syudad sa pila ka mga telecommunication companies agud nga mapahalinton sa ila ang nasambit nga plano.
