LAMBUNAO, ILOILO – Lab-as pa sa gihapon para sa mga Lambunaonon ang kamatayon sang apat ka manunudlo sang Lambunao National High School sa Lambunao, Iloilo.
Sa interview sang Bombo Radyo kay Vice Mayor Arvin Losaria sang nasambit nga banwa, iya ginpahayag nga kadungan sang tigkalalag, naga-isa man ang mga pumuluyo sang Lambunao sa pagdumdum sa mga minatay ilabi na sa apat ka mga manunudlo nga nalumos sang natabo ang Iloilo strait tragedy.
Suno kay Losaria, kapin na sa tatlo ka bulan ang nakaligad apang kasubong nga lab-as pa sa gihapon ang mga natabo.
Ginpahayag naman ni Losaria nga kadungan sang pagsaulog sang tigkalalag, wala man nagapabaya ang Local Government Unit sang Lambunao sa pagpatuman sang security plan agud nga wala sang insidente nga matabo.
Sa subong, nagalaum naman ang bise alkalde nga mapaguwa na sang Martime Industry Auhtority ang resulta sang imbestigasyon sa natabo nga trahedya.
Nahibalu-an nga ang mga manunudlo amo sanday Ma. Emilie Legarda, Zenie Anilao, Lynlyn Janolino kag Ivy Grace Labordo.
