ILOILO CITY – Isa ka maayo nga kahigayunan para sa mga ginikanan nga matudlu-an sang katikesis ang ila kabataan ang pagkansela sang Flores de Mayo bangud sa Coronavirus Disease 2019 (COVID-19).
Sa Good Morning Philippines program, ginpahayag ni Rev. Fr. Angelo Colada, Director sang Social Communications sang Archdiocese of Jaro, nga indi kinaandan ang pagpatigayun sang Flores de Mayo subong nga tuig bangud sa ginapatuman nga lockdown.
Suno kay Colada, kun sa kinaandan, sa tagsa ka Mayo, ang kabataan ang nagapangita sang bulak, nagapadulong sa simbahan kag nagapakigbahin sa prusisyon sa katapusan sang bulan bilang pagpakita sang mabaskog nga pagtuo kay Birhen Maria.
Ginpahayag ni Colada nga bangud sa COVID-19, ang kabataan ang gina-engganyo nga magpangamuyo kag maghalad sang pagkaon ukon kwarta kay birhen Maria sa ila tagsa ka mga balay paagi sa paggiya sang ila ginikanan.
Sa bahin sang Simbahang Katolika, ginpahayag sang natungdan nga may yara sang ginapanghatag nga balasahon sa tagsa ka parokya kag may yara man sang live streaming sang Flores de Mayo sa official social media account.
Apisar nga naglain na ang pagpatigayon sang Flores de Mayo, ginpahayag ni Colada nga tion ini para sa mga giikanan nga mas mapalapit sa ila kabataan paagi sa pagtudlo sang katesismo.
