ILOILO CITY — Ginaduso sang mga mamalidha sang pungsod Italy ang isa ka layi nga naga-ban ukon nagadumili sa pagkaon sang ice cream kag pizza sa tungang gab-i.
Suno kay Deputy Mayor Marco Granelli, tuyo sang tikang nga mabalanse ang kalinong kag katawhay sang mga residente kun kaagahon.
Apang para sa mga Italian, ang midnight snack ukon kilala sa tawag sa ila nga late-night gelato ang parte sang Italian culture nga sa subong, dako ang posibilidad nga madula bangud sa ginaduso nga layi.
Ang legislative paper sang layi ang gin-file sang city’s local government sang Milan sa diin magadumili sa mga pumuluyo sa pagkaon sang ice cream, pizza, kag mga ilimnon sa kaagahon agud mabuhinan ang mga magahod nga grupo nga nagalibot sa dalan nga nagdisturbo sa pagpahuway sang mga residente sang Italian City.
Sakop sang layi ang 12 ka mga Distrito sang Milan nga mangin epektibo umpisa sa bulan sang Mayo tubtob Nobyembre.
Masugod naman ang pagdumili sa pizza kag ice cream sa las-12:30 sang kaagahon kun weekdays kag la-1:30 sang kaagahon kun weekends kag public holidays.
May yara naman tubtob May ang mga residente agud i-appeal kag amyendaran ang ginaduso nga layi.
Matandaan nga sang 2013, anay man nga ginduso ang pag-ban sa ice cream kag pizza kun kaagahon ni Mayor Giuliano Pisapia, apang wala napatuman bangud sa pagpamatok sang mga Italian residents.
