UNITED KINGDOM – Ang pagkaon sang oily fish ang natukiban nga makapahagan-hagan sa risgo sa pag-angkon sang Rheumatoid Arthritis.
Santo sa pagtuon sang mga eksperto, ang pagkaon sang bisan tunga lang sang isa ka bilog nga oily fish kaangay sang salmon ukon mackerel sa isa ka semana ang makabuhin sang halos ka tunga sang risgo sa pag-angkon sang nasambit nga balati-an.
Ang mga palakaon sang isda ang may 1/3 nga mas manubo nga risgo sa pag-angkon sang diabetes samtang ang nagakaon naman sang oily fish kaangay sang mackerel ang may ka tunga gid nga mas manubo ang risgo sa pag-angkon sang Arthritis.
Suno kay Prof. Alan Silman, medical director sang Arthritis Research sa United Kingdom, ang ginatawag nga fishy diet ukon masami nga pagkaon sang isda ang may maayo nga epekto sa ikaayong lawas bangud ang isda ang manggaranon sa omega 3 nga nagahatag sang proteksyon sa heart kag utok.
Ang isda suno kay Silman ang isa man ka anti-inflammatory agent rason nga maayo ini nga pambato sa paglikaw sa Arthritis.
