Humalin sa paborito naton nga taho kag sa subong nagbantog naman ang milktea, indi gid madula diri ang panakot nga sago.
Ang sago ang isa ka sahi sang starch nga naghalin sa tropical palm stems sa diin mabilog-bilog ini kag makalilingaw man nga usapon.
Ang sago ang nangin kabahin man sang staple starch sa iban nga mga pungsod kaangay sang Indonesia, Malaysia, kag Papua New Guinea.
Natukiban man sa mga pagtuon nga ang sago ang indi basta-basta lang nga sago bangud dako ang mahatag sini nga benepisyo sa ikaayong lawas ilabi na sa mga naga-ehersisyo.
Suno kay Ryan Raman, registered dietitian sa Auckland, New Zealand, manggaranon sa antioxidants kag resistant starch ang sago sa diin nagabulig ini pasangkad sang exercise performance.
Pahayag ni Raman, ang high carbohydrate content sang sago ang nagabulig prolong sang endurance activity kag nagapaboost sang energy sang isa ka indibidwal nga naga-ehersisyo.
Ang pagkaon sang sago pagkatapos sang ehersiyo ang makabulig man sa lawas nga makarecover sa kakapoy.
Ang antioxidants kag resistant starch sa sago ang makabuhin naman sang risgo sa pag-angkon sang heart disease.
Magluwas diri, ang resistant starch sa sago ang nagabulig man panubo sang blood sugar levels kag appetite, kag nagapa-improve sang digestion.
Dugang pa sang dietician, recommended man ang lemon sago pudding para sa mas healthy nga recipe kag pagkaon sang sago.
Diri kag ginapabukalan lamang ang sago sa tubig, lemon juice kag honey sa diin ini ang masami nga ginaserbe sa New Zealand.
