Kun magpaligo kita sa baybay masami nga makit-an naton ang sea vegetables nga gulaman ukon seaweed nga ginalakot sa nanuhay-tuhay nga linuto kaangay sang ensalada, sinabawan, sushi rolls kag iban pa.
Ang seaweed ang may duag nga pula, green, brown kag black kag suno sa mga eksperto, indi lang ini basta-basta nga sahi sang utan bangud tuman kadamo ang mahatag sini nga benepisyo sa ikaayong lawas.
Suno kay Sharon O’Brien, registered dietician sa Ireland, ang seaweed ang may yara sang concentrated source sang iodine kag amino acid nga ginatawag tyrosine.
Ang tyrosine ang kinahanglan sang thyroid gland agud maka-function sang maayo, maka-release sang hormones nga naga-kontrol sang growth, energy production, reproduction kag naga-repair sang damaged cells sa lawas.
Manggaranon man ang seaweeds sa antioxidants, kaangay sang vitamins A, C kag E, carotenoids kag flavonoids nga naga-proteher sa lawas batok sa cell damage.
Nagabulig man sa pagpaniwang ang seaweeds bangud puno ini sang fiber kag fucoxanthin, nga nagapadugang sang metabolism.
Ang Fucoxanthin kag iban pa nga compounds sa seaweed ang nagabulig man sa pagpanubo sang blood sugar levels, kag risgo sa pag-angkon sang balatian nga diabetes.
