ILOILO — Duha ang patay sa nagluntad nga engkwentro sa tunga sang Communist Party of the Philippines-New People’s Army (CPP-NPA) kag Armed Forces of the Philippines sa boundary sang Barangay Cawilihan kag Barangay Bucari, Leon, Iloilo.
Ang mga napatay amo sanday Nahum Camariosa alyas Rodel/Bebong, Squad Leader sang Southern Panay Front, kag residente sang Brgy. Manampunay, Leon, Iloilo kag si Alyas Jun-jun/Cedrick/Nenz nga myembro sang Communist Party of the Philippines-New People’s Army (CPP-NPA).
Sa interview sang Bombo Radyo kay Lieutenant Colonel J-Jay Javines, spokesperson sang 3rd Infantry Division, Philippine Army, iya ginpahayag nga samtang naga-patrol sa kabukiran sang Leon ang katapo sang gobyerno, may nabaton sila nga report nga may presensya sang mga Communist Terrorist Group (CTG) sa amo nga lugar.
Suno kay Javines, isa ka dako nga accomplishment sa bahin sang gobyerno ang pagkapatay sa isa sa mataas nga leader sang Southern Panay Front sa diin ginalantaw nga dako nga kapaslawan sa CPP-NPA.
Ginpahayag man sang natungdan nga isa ka leadership vacuum ang amat-amat nga pag-dismantle sang mga rebelde nga grupo sa bug-os nga Panay.
Nahibaluan nga yara na lang 60-70 ang mga nabilin nga myembro sang Komiteng Rehiyon Panay samtang ang Southern Panay Front naman ang may pito na lamang ka mga myembro.
Nagpanawagan naman si Javines sa mga rebelde nga magpanaog sa kabukiran kag magbalik sa gobyerno agud malikawan nga mapatay sa engkwentro.
