Ginplastar sang Department of Public Works and Highways (DPWH) Region VI nga dapat gastuhan sang kontraktor ang rectification sa porsyon sang seawall nga naguba sa Brgy. Guibongan, Miagao, Iloilo.
Hulyo 23 sang naguba ang ginabanta 20-metros nga porsyon sang proyekto bangud sang mabaskog nga hampak sang balod kag hangin dala sang habagat nga ginpabaskog ni Bagyo Carina.
Sa interview sang Bombo Radyo kay Engineer Sanny Boy Oropel, director sang Department of Public Works and Highways Region VI, iya ginpahayag nga nagapadayon pa ang pag-construct sang proyekto gani sulod pa ini sa warranty period.
Gin-athag ni Oropel nga mahimo ma-extend sang gamay ang completion date bangud hatagan man sang konsiderasyon ang natabo nga bagyo. Apang suno sa director, bangud sulod pa ini sa warranty period, wala sang idugang nga budget ang ahensya.
Indi pa maka-komento ang director sa reklamo nga wala naplanuhan sang maayo ang proyekto apang ginsiling sini nga i-review ang rason sang damage.
