Makabig na nga ‘urgent’ ang pagkinahanglan sang Iloilo City nga maka-arkila sang refrigerated vans agud may mabutangan sang bangkay sang COVID-19 patients samtang indi pa makabaton sang cadaver ang nagaisahanon nga crematorium facility sa syudad.
Sa interview sang Bombo Radyo kay Engr. Noel Hechanova, head sang City Environment and Natural Resources Office (CENRO), iya ginpahayag nga magalawig pa sa ginabanta 15 ka-adlaw ang temporaryo nga pagsuspende sa operasyon sang Gegato Abecia Funeral Parlor and Crematorium agud mahuman ang ila ginakaayo nga pasilidad.
Gin-ako ni Hechanova nga nabudlayan ang syudad sa pagpangita sang ma-arkilahan nga refrigerated vans bangud kalabanan sang sini nga sahi sang mga van sa Iloilo City ang ginabutangan sang pagkaon kag indi sang mga bangkay.
Apisar sini, ginatinguhaan sang syudad nga makapangita man sang bulig pinaagi sa pagpakig-angot sa iban pa nga local government unit.
