ILOILO CITY – Nangin emosyunal ang pag-atubangay sang pamilya Demafelis kag ni Presidente Rodrigo Duterte, sa pagdu-aw sang presidente kahapon sa hamyang ni Joanna Daniela Demafelis sa Barangay Ferraris, Sara, Iloilo.
Nagdugay sang kapin isa ka oras ang pagtinir sang presidente sa puluy-an sang mga Demafelis kun sa diin nagpalab-ot sang pagpakig-unong ang presidente.
Pagsulod pa lang sa puluy-an gilayon nga nagdiretso si Duterte sa lungon ni Joanna kag naghalad sang pangamuyo.
Ginpasiguro ni Duterte nga magawad ang duta sang mga Demafelis nga naprenda kag makatapos sang pag-eskwela ang utod ni Joanna nga si Joyce.
Ginhatagan man sang presidente sang cellphone nga touch screen ang mga miyembro sang pamilya Demafelis.
May bitbit man nga cash ang presidente para ihatag sa pamilya.
Antes maghalin sa Sara, nagpakuha pa sang laragway ang presidente sa atubang sang lungon ni Joanna, upod ang pamilya Demafelis.