ILOILO CITY – Natabuan lang ang pagkit-anay nanday Sen. Antonio Trillanes, Magdalo Rep. Gary Alejano kag pila ka miyembro sang Liberal Party nga sanday angay senatorial candidate Mark Lapid, Political Adviser Ronald Llamas kag Vice Governor Ace Cerilles sa Iloilo International Airport sang September 4, 2015.
Ang laragway nga ginprisinta ni Aguirre sa media ang kuha sa isa ka coffee shop sa Iloilo Airport, apang indi kalakip diri si Sen. Bam Aquino nga una na ginpahayag sang tiglikom nga upod man sa meeting.
Sa pagpangusisa sang Bombo Radyo, natukiban nga nagpadulong sa Iloilo ang mga miyembro sang Liberal Party kaupod ang presidential candidate nga si Mar Roxas agud magtambong sa conference sang League of Municipalities of the Philippines Visayas cluster.
Apang magluwas sa mga kandidato sang LP, nagpadulong man sa Iloilo sanday anay Sen. Bongbong Marcos kag mangin si Alan Peter Cayetano, mga vice presidential candidates sadto.
Suno sa isa ka alkalde sa Iloilo nga luyag lang ihinago ang ngalan, nagpadulong sa Iloilo sanday Sen. Antonio Trillanes kag Gary Alejano sa Iloilo para sa iban nga event.
Gin-imbitahan ang mga ini sang Magdalo Iloilo chapter para sa aktibidad sang grupo sa 2nd Hablon Festival sa banwa sang Miag-ao, Iloilo.
Una na ginpahayag ni Aguirre nga ang nasambit nga litrato ang kuha sa meeting sang oposisyon sa Marawi kag pila ka adlaw matapos ang ginapahayag sini meeting, nangin magamo ang siyudad.
Apang nagkambyo man ini kag ginpahayag nga na-misquote lang siya sang media.