NEW LUCENA, ILOILO — Dako na nga perwisyo ang natuga sa mga residente sang Sitio Borot, Barangay Bilidan, New Lucena, Iloilo ang pagpasirado sang ila mayor nga alagyan sa sulod sang duha ka semana.
Sa interview sang Bombo Radyo kay Nick Hembra, isa ka mangunguma, iya ginpahayag nga ang alagyan ang 16-anyos na nga nagaserbi bilang ila nga dalan halin sa kaumahan padulong sa merkado.
Suno kay Hembra, sugod sang nasirado ang ila alagyan, indi na sila ka hulag sang maayo, sa diin, pati ang ila pagpananum sang cacao ang naapektohan na.
Ginpahayag man sini nga indi lang sila nga mga mangunguma ang nahatagan sang perwisyo, bangud pati ang mga estudyante ang nagapanglihid na sa kabukiran agud nga maka-eskwela.
Nahibaluan nga ang nasambit nga dalan ang ginsirado gamit ang cyclone sugod sang nagligad nga Mayo 14, 2024.
Ginpaathag naman sang punong barangay sang Barangay Bilidan, New Lucena, Iloilo nga antes paman nabakal sang private owner ang duta nga nahamtangan sang dalan nga ginsiraduhan, ginaagyan na ini sang mga residente sa masobra isa ka dekada.
Sa interview sang Bombo Radyo kay Punong Barangay Valentino Calumay, iya ginpahayag nga ginkonsiderar ang alagyan bilang barangay road apang wala sang mga dokumento nga ini ang gin-donar sa gobyerno.
Suno kay Calumay, apisar nga wala sang dokumento, cover ang alagyan sang provincial ordinance no. 14 nga nagasaad sang wala nagapahanugot sa tag-iya nga kudalan ukon siraduhan ang dalan.
Ginpahayag man sini nga ang ordinansa ang iya ginapakigbato para sa mga residente kag bila taga-sunod sang nakasaad sa ordinansa.
Nahibaluan nga nagpadulong na ang punong barangay sa Office of the Municipal Mayor kag Provincial Legal Department agud magpangayo sang advice agud masolbar ang problema.
Nagkoordinar naman ang natungdan sa kapulisan agud maimplementar ang ordinansa ag gilayon nga mabuksan ang ginpasirado nga alagyan.
