ILOILO CITY – Ginkumpirma sang mga organizers sang Palarong Pambansa 2017 nga ginadumilian ang pagkuha sang private nga mga coach, para sa mga eskwelahan nga magapasakop sa nasambit nga sporting event.
Sa exclusive interview sang Bombo Radyo Iloilo, ginpahayag ni Nick Valenzuela, training director sang 60th Palarong Pambansa, hugot nila ini nga ipatuman sa nagahilapit nga kompetisyon.
Ginpahayag ni Valenzuela nga nalakip man sa amo nga mando sang Department of Education nga ang mga coaches ang dapat magsumite sang certificate nga nagapamatuod nga nagpaidalom ang mga ini sa indi manubo sa 40 oras nga training sa combative sports kag 24 oras nga paghanas sa non-combative sports.
Apang sa mga coaches naman nagikan sa pribado nga mga buluthuan nga nagapamilit maghanas sa mga atleta, dapat ang mga ini magpakita sang pamatuod nga sila ang may SSS contribution.
Ang Palarong Pambansa 2017 pagahiwaton sa Abril 23-29 sa Antique.