ILOILO CITY – Temporaryo anay nga ginpa-untat ang pagkuha sang swab sa Diamond Jubilee Hall sa Syudad sang Iloilo.
Sa exclusive interview sang Bombo Radyo kay Iloilo City Mayor Jerry Treñas, iya ginpahayag nga nagdesisyon sila nga indi anay magbaton sang mga luyag magpaidalom sa reverse transcription polymerase chain reaction (RT-PCR) test bangud nag-untat man ang Western Visayas Medical Center Sub National Laboratory sa pagbaton sang mga specimen.
Suno kay Treñas, wala sang storage area sang mga specimen ang Iloilo City Government rason nga wala sila anay nagbaton sang mapakuha sang swab.
Sa tion nga magbukas naman ang Western Visayas Medical Center Sub National Laboratory, liwat naman nga magapadayon ang operasyon sang Iloilo City Government sa pagkuha sang swab sa Diamond Jubilee Hall.
Samtang, gin-athag man sang alkalde nga madamo pa sila sang mga eskwelahan nga ginpadulungan agud magserbe nga quarantine facility.
Ini ang kasunod man sang pagdamo sang kaso sang local transmission sang COVID-19 sa Syudad sang Iloilo.
