ILOILO CITY – Wala pa sang schedule kun san-o patigayunon ang pagkuha sang swab sample para sa RT-PCR test sa mga driver kag vendor sa syudad sang Iloilo.
Sa interview sang Bombo Radyo kay Maricel Mabaquiao, pinuno sang Local Economic Enterprise Office, iya ginpahayag nga ang pagpatigayon sang RT-PCR test ang ginmandu mismo ni Mayor Jerry Treñas bilang pagpasangkad sang kampanya batok sa COVID-19.
Suno kay Mabaquiao, mahimo nga “by section” sa tagsa ka merkado ang pagkuha sang swab sample agud nga indi man maapektuhan ang baligyaanay sang produkto.
Ang mga magnegatibo sa COVID-19 ang mahimo na nga makabalik sa pagnegosyo samtang ang mga magpositibo naman ang kinahanglan gid nga magpaidalom sa 14-day quarantine.
Nauna na nga ginpaidalom sa RT-PCR test ang mga fish vendors sa tagsa ka merkado kun sa diin kasubong man nga proseso ang ila nga ginsunod.
