ILOILO – Isa ka istorya sang pagdayaw, pagtuo kag pagbag-o ang ginpakigbahin sang isa ka Ilongga matapos nga naka-upod si Pope Francis.
Ini amo si Sonia Cadornigara, regional coordinator ng Homeless People’s Federation of the Philippines, Inc. (HPFI) sa Iloilo City.
Sa interview sang Bombo Radyo kay Cadornigara, iya ginpahayag nga Oktubre 2014 sang ginpili siya bilang isa sa 40 ka mga community leader sang Simbahang Katolika sa nagkalain-lain nga pungsod sa kalibutan nga makigkita kay Pope Francis para sa Global Meeting of Popular Leaders.
Ang nasambit nga pagtililipon ang natabo, isa ka tuig pa lag matapos napilian si Pope Francis bilang lider sang Simbahang Katolika.
Para kay Cadornigara, ang hitabo nga indi ang indi lang isa ka kadungganan kundi isa man ka opurtunidad agud maghatag sang inspirasyon sa mas madamo nga mga tawo.
Sa pihak sang hugot nga protocol sang Vatican, nakup-an ni Cadornigara si Pope Francis sa diin ginhatagan pa siya sang holy rosary kag ginpanugyanan nga padayunon ang iya adbokasiya nga paghatag sang balay kag duta sang mga pigado.
Sang 2015, liwat naman nga nahatagan sang kahigayunan si Cadornigara nga makita si Pope Francis nga gintambungan sang 200 ka mga delegado halin sa nagkalain-lain nga mga pungsod.
Gani sa pagtaliwan sang Santo Papa, isa man si Cadornigara, sa mga tuman nga nagbatyag sang kasubo matapos nabatian ang masubo nga balita.
Sa ila naman nga balay, naka-print ang canvas sang picture nila ni Pope Francis nga isa ka handumanan sang pinasahi nga tion sa iya kabuhi.
