ILOILO CITY – Sa subong, lapnagon na ang paglapta sang mga sex scandal.
Bangud sini, kinahanglan nga mahibaluan nga may yara sang layi nga nagahatag sang proteksyon sa mga biktima kag nagahatag sang penalidad sa mga offender sini.
Sa interview sang Bombo Radyo kay Atty. John Marti Maghopoy, Bombo abogado, iya ginpahayag nga ang pagkuha, pagpalapta kag mangin ang paglantaw sang sex video ang mahimo nga makasuhan kun sa diin, ang penalidad amo ang pagkapreso kag multa.
Ini ang RA 9995 ukon ang Anti-Photo and Video Voyeurism Act of 2009 nga ginpasar kasunod sang natabo nga kontorbersiya sa tunga sang celebrity doctor nga si Hayden Kho kag sexy actress nga si Katrina Halili kun sa diin, naglapta ang ila nga sex video.
Ang voyeurism amo ang pagpanglingling sa hiligaynon nga lenggwahe.
Sa sini nga layi, wala ginapahanugutan ang pagkuha sang picture ukon video sang tawo ukon sang mga tawo nga naga-perform sang bisan ano nga sahi sang sexual act, pagkuha sang picture ukon video sang pribado nga bahin sang lawas sang babayi nga wala sang pahanugot.
Wala man ginapahanugutan ang pagkopya kag pagpalapta sang sini nga content, pagbaligya kag pagpatan-aw sa iban nga tawo.
Ang mapamatud-an nga guilty ang may penalidad nga tatlo tubtob pito ka tuig nga pagkapreso kag P100, 000 tubtob P500, 000 nga multa.
Magluwas sini, mahimo man nga mapasakaan sang kaso nga Grave coercion kag Threat.
Mahimo man nga magbayad ang offender sa biktima sa damages nga natuga bangud sa naagyan nga kasakit, anxiety, pagkaguba sang reputasyon, kahuy-anan kag iban pa nga malain nga naagyan umpisa nga ginpalapta ang sex video.
Dugang pa sang layi, kun ang offender ang isa ka public official, magluwas sa criminal charges, may yara pa sang ipasaka nga administrative complaint.
Kun ang offender ang isa ka foreigner, mahimo ka nga ma-deport apang dapat nga tapuson anay ang pagserbe sang penalidad.
Sa tion naman nga menor de edad ang biktima, may yara pagid sang salabton ang offender sa Anti-Child Pornography Law.
Sa data sang Anticybercrime group sang Philippine National Police as of June 2022, may yara sang masobra sa 34, 000 ka mga kaso sang cybercrime.
Sa mga biktima sang sini nga krimen, indi magkahadlok nga mag-report sa otoridad.
