ILOILO CITY — Ginkilala sang mga pamilya sang missing crew sang naglugdang nga MV Starlite Atlantic, ang nangin bulig sang Bombo radyo sa padayon nila nga pagpangita sang ila mga himata.
Suno kay Dominador Gomez sang Jaro Iloilo City, indi man sini makabug nga tuman na ka malipayon ang ila new year tungod sa padayon nga pagpangita kay Mark Anthony Gomez apang ginpalab-ot sini sa gihapon ang pagpanamyaw sa iya mga himata.
Iya man ginapasalamatan ang amga nagbulig sa iya pinansyal kag labi nga ginpasalamatan sini ang bombo radyo nga amo gid ang nagbulig sa ila follow-up sa tagdumalahan sang Starlite Ferries Inc kag nagpalab-ot sang ila mga reklamo amo man ang pagdul-ong sang update sa ila nga mga himata nga padayon nga nagalaum sang mga bag-o nga impormasyon.
Aminado man ang isa sa mga utod sang missing nga crew sang MV Starlite Atlantic nga tumandok sang Passi City nga ginbudlayan sila sa tagdumalahan sang amo nga kompaniya apang nahatagan sang giya sa pag-upod kag pagtugay-gay sang Bombo Radyo agud mapalab-ot ang ila mga reklamo sa tagdumalahan sang amo nga Ferry Company.
Suno kay Sugar Ray Calvez, utod ni Engine Cadet Nicanor Calvez sang Brgy. Agdahon Passi City, daku ang bulig sang Bombo Radyo sa ila pagduso nga ipadayon ang pagpangita sang ila himata ilabi na nga indi ang mga ini mahim-os sa pagligad sang mga inadlaw.
Nagalaum naman ini nga indi mag-untat ang pagpangita sa iya himata.
Madumduman nga naglugdang ang MV Starlite Atlantic sang Disyembre 26 sang nakaligad nga tuig kag tubtob subong wala sa gihapon makita ang ila himata.