ILOILO – Tuyo sang ginpatigayon nga campus peace development forum sa Alcarde Gustilo Memorial National High School sa banwa sang Calinog nga ipakita sa mga kabataan nga mas maayo ang buwasdamlag nila kon sila ang magatutok sa pag-eskwela.
Ini ang ginpahayag ni Lt Col Dennis Alcarde, ang group commander sang Tactical Operations Group 6 sang Philippine Air Force.
Sa interview sang Bombo Radyo kay Alcarde, iya ginpahayag nga ang peace development training ang regular na nga programa sang nasambit nga ahensya.
Nangin kabahin sang programa ang mga lecture nahanungod sa insurgency, mga disbentaha kung mag-upod sa rebelde nga grupo, kag mga programa sang gobyerno.
May yara man sang gin imbitar nga anay miyembro sang rebelde kag ginsaysay niya ang mga kabudlayan sang isa ka rebelde nga ngapalagyo sa awtoridad.
Nalakip man sa programa ang static display sang mga facilities sang Philippine Air Force.
Suno kay Alcarde, nangin maayo ang pagbaton sang mga kabataan sang ila nga programa.
Iya ginpahayag nga target ang mga eskwelahan nga nahamtang sa malayo nga mga lugar ilabi na sa kabukiran sa diin ginapatihan madata ang recruitment isang rebelde nga grupo.
Dugang pa ni Alcarde, ang Philippine Air Force ang kaangay man sang iban nga ahensya sang gobyerno nga may yara sang daku nga papel sa pag-untat sang insurhensya nga subong nagakinahanglan ang bulig sang tanan agud gilayon nga matapna.
