Natalana na buwas, Hulyo 12, ang paglunsar sang “Rice for All” program sang Department of Agriculture (DA) agud nga maka-benepisyo ang general population sa presyo sang bugas nga P45 per kilogram tubtub sa P48/kg.
Suno kay DA Assistant Secretary Arnel de Mesa, spokesperson sang ahensya, mahimo nga imported kag local rice na ang i-upod sa sini nga programa.
Mahimo man ini i-dungan suno kay De Mesa sa pagpasangkad sang programa nga nagabaligya sang P29 per kilo nga daan apang maayo pa man nga bugas sa vulnerable sector sa dugang nga Kadiwa sites sa Malabon, Navotas, kag Marikina.
Sakop sang mga benepisyaryo sini ang Pantawid Pamilyang Pilipino Program (4Ps), senior citizens, solo parents, kag persons with disabilities (PWDs).
Suno kay De Mesa, madamo ang naga-hingyo kaangay sa construction workers nga kuntani kabahin man sila sang P29 program, apang bangud indi sila covered sini nga programa, pwede suno sa natungdan nga maka-avail sila sa Rice for All program.
Gin-athag man sini nga ang Rice for All program ang iga-lunsar sa mga lugar nga may yara lamang sang Kadiwa sites.
Matandaan nga una na nga ginpahayag sang DA nga target nila nga pasangkaron pa ang P29 kag Rice for All programs sa Visayas kag Mindanao sa katapusan sang Agusto ukon sa temprano nga bahin sang Septyembre.
