ILOILO CITY – Mahimo nga mistaken identity ang pagluthang-patay sa isa ka 17 anyos nga solterito nga nagahampang sa sulod sang computer shop sa Brgy. Salvacion Habog-Habog, Molo, Iloilo City.
Sa interview sang Bombo Radyo sa tag-iya sang computer shop nga nagpahinago lang sang pangalan, iya ginpahayag nga nagapungko kag nagahampang sa computer ang biktima nga si John Paolo Yson sang hinali lang nga may nagdulog nga motorsiklo kag nagderetso sulod ang isa ka persona nga nakasuksok sang face mask kag helmet.
Suno sa tag-iya, isa ka lupok ang ila nabati-an apang tatlo ka empty shells ang nakita sa crime scene kun sa diin santo sa pagpangusisa, ulo ang igo sang biktima.
Ginpahayag sang tag-iya nga bangud sa kakulba, nagpalagyo ang iban pa nga mga nagahampang sa sulod sang computer shop.
Pagkatapos sang insidente, gilayon man nga nagguwa ang suspek nga nakasuksok sang asul nga jacket, naka-pantalon kag naka-tsinelas nga nagsanto naman sa kuha sang Close Circuit Television camera sa lugar.
Ang driver naman sang motorsiklo ang nakasuksok sang grey nga sweatshirt, naka-shorts, naka-tsinelas, naka-face mask kag naka-helmet.
Nakita man nga lunsay may bitbit nga pistola ang duha ka mga suspek nga nagpalagyo matapos ang insidente.
Samtang, wala naman sang ideya si Punong Barangay Nelson Muñoz kun ano gid ang motibo sa pagpatay sa biktima.
Sa interview sang Bombo Radyo kay Muñoz, iya ginpahayag nga computer shop kag balay lamang ang opisyo sang 17 anyos nga solterito.
Suno kay Muñoz, wala sang malain nga record ang biktima kag mahimo nga nasal-an lamang sang mga suspek.
