ILOILO CITY – Lunsay alegasyon lamang ang mga nagalagaw nga istorya sa mga motibo nga nagaguwa sa pagluthang-patay sa isa ka tricycle driver sa Brgy. Jalandoni Estate, Lapuz, Iloilo City magluwas bilang drug surrenderee.
Ang biktima amo si Ernesto Regalado, 45, sang Brgy. Alalasan, Lapuz.
Sa interview sang Bombo Radyo kay Police Major Mark Evan Salvo, hepe sang La Paz Police Station, iya ginpahayag nga wala sang may nakalab-ot nga impormasyon sa ila talatapan nga gina-alegar si Regalado ang nagtudlo nga nagaduso sang iligal nga droga si Arnel Porto, tricycle driver man sang Brgy. Rizal Lapuz Sur nga gin buy-bust sang tinalikdan nga semana apang nakapalagyo sa mga kapulisan kag mahimo nga ini ang nagbalos.
Magluwas sini, isa man ka nagalagaw nga motibo amo ang mistaken identity.
Ini bangud nga ang manghod ni Regalado ang yara sa presuhan bangud man sa iligal nga droga kag mahimo nasal-an lamang ini.
Suno kay Salvo, wala sang iban nga rekord si Regalado sa ila talatapan magluwasna lamang sa drug surenderee ini apang nakatapos ukon nakagradwar na sa drug rehabilitation.
Luyag pa kuntani ni Regalado nga magkuha sang driver’s license para sa iya nga tricycle agud may yara ini sang trabaho.
Dugang pa sang hepe, nakig-angot naman sila sa pamilya ni Regalado kag suno sa ila wala man ini sang kontra.
Sa subong, padayon pa ang imbestigasyon sang mga kapulisan sa motibo sa pagluthang patay sang riding-in-tandem suspects kay Regalado.
