ILOILO CITY – Pila lamang sa mga authentic Filipino dish nga ginakalangkagan sang kadam-an amo ang Binagoongang Baboy kag Sizzling Tofu.
Sa Good Morning Philippines program, ginpatpat ni Dina Constantino, chief cook sang Jo’s Chicken Inato sa Plazuela de iloilo, ang pagluto sang nasambit nga mga putahe nga sampat sa sabor nga ginapangita sang mga Filipino kag bisan sang mga dumuluong.
Para sa Binagoongang Baboy, lakip sa ingredients amo ang oil, baboy, ahos, bombay, kamatis, ginamos kag hot pepper.
Una nga step amo ang pagpa-init sang mantika sa kalaha antes ibutang ang karne sang baboy nga ginhiwa kasubong sang cube.
Masunod nga ibutang ang gintuktok nga ahos, bombay kag ilakip ang ginamos kag gisahon tubtub nga maluto.
Kun luto na, mahimo na nga ibutang bilang toppings ang hot pepper kag ready to serve na ang Binagoongang Baboy.
Samtang para naman sa Sizzling Tofu, lakip sa ingredients amo ang mantika, tofu, bell peppers, ahos, bombay, mayonnaise, sauce, butter, kalamay, calamansi kag tubig.
Suno kay Constantino, pritohon ang ginhiwa nga tofu gamit ang mantika sa sulod sang lima ka minutos tubtub nga malab-ot ang golden brown nga color.
Kun luto na ang tofu, mahimo na ini nga bak-iton kag isunod sa pagluto ang sauce paagi sa pag-mix sang bell peppers, ahos, bombay, mayonnaise, sauce, butter, kalamay, calamansi kag tubig.
Kun maglapuyot na ang mayonnaise, mahimo na nga isimpon ang ginprito nga tofu, i-mix tubtub nga maluto sang maayo.
Agud nga mas maka-engganyo, mas maayo nga ang niluto ang ibutang sa sizzling plate.
