ILOILO CITY – Ginakabig ni Pope Francis nga isa ka genocide ang natabo nga pagmaltrato sa indigenous people sa Canada.
Ini matapos ang iya anum ka adlaw nga trip sa amo nga lugar kung sa diin, liwat ini nga nagpangayo sang pasaylo sa mga survivors sang pagpang-abuso sa Catholic-run schools.
Suno sa Santo Papa, wala niya ini ginmitlang sa Canada bangud nga sang amo nga mga inadlaw, wala ini nagsulod sa iya paminsaron.
Ginpahayag man niya nga hugot niya nga gina-kondenar ang amo nga hitabo.
Sa nangin trip niya, nagpangayo ini sang pasaylo sa indi maayo nga pagtrato sa Indigenous communities sa residential schools sa Canada kun sa diin, ang mga kabataan ang ginpadala didto bilang kabahin sang polisa sang pwersahan nga assimilation.
Gintumod sini ang “cultural destruction” ang “physical, verbal, psychological kag spiritual abuse” sa mga kabataan sa sulod sang pila ka mga dekada.
Humalin sang late 1800s tubtob 1990s, nagdangat sa ginabanta 150,000 ka mga kabataan ang ginpadala sang Canadian government sa 139 ka mga residential schools nga ginapadalagan sang simbahan kun sa sdii, ginbulag ang mga ini sa ila nga mga pamilya, sa ila kultura kag lenggwahe.
Madamo ang nangin biktima sang physical kag sexual abuse kag linibo ang ginapatihan nga napatay bangud sang balatian, malnutrition kag kapabayaan.
Humalin sang May 2021, masobra sa 1,300 ka mga unmarked nga lulubngan ang nadiskubrehan sa pila ka bahin sang anay eskwelahan nga nagtay-og sa bilog nga Canada kag amat-amat nga nahibaluan ang madulom nga bahin sang kasaysayan.
