ILOILO CITY – Wala nakuhaan sang Closed Circuit Television (CCTV) ang natabo nga pagmaoy sang tatlo ka mga pulis sa sulod sang isa ka disco bar and restaurant sa syudad sang Iloilo.
Ini ang isa sa mga pagpanghangkat sa imbestigasyon sang Regional Investigation and Detective Management Division (RIDMD) sang Police Regional Office (PRO) 6.
Sa interview sang Bombo Radyo kay Police Lt.Col. Pablito Osmod, pinuno sang RIDMD, iya ginpahayag nga sila mismo sa PRO-6 ang ulihi nalang nga nakahibalo nga pulis ang mga naulamid sa kinagamo.
Ini bangud nga suno kay Osmod, makabulig kun tani sa pagkumpirma ang kuha sang CCTV sang tion nga nagluntad ang insidente.
Bangud sini, ginmandu-an na ang investigation section sang RIDMD nga magpatigayon sang imbestigasyon sa mga pulis nga nagresponde sa insidente agud nga makuhaan sang pahayag kag makabulig sa imbestigasyon.
Isa man sa gina-usisa suno sa natungdan kun nga-a nakaguwa sa vicinity sang PRO-6 sanday Police Chief Master Sergeant Jose Dinggal, Police Senior Master Sergeant Fernil Mark Mallorca kag Police Staff Sergeant Ralph Mabuque bisan pa nga may yara sang restrictions.
Samtang, nagapati naman si Iloilo City Police Office (ICPO) Director Police Col. Martin Defensor Jr. nga wala sang sala ang mga pulis nga nagresponde sa insidente.
Sa interview
sang Bombo Radyo kay Defensor, iya ginpahayag nga ginbuhat lang sang mga pulis ang ila trabaho.
Sa pagkamatuod suno kay Defensor, sa pag-abot sang mga pulis sa disco bar and restaurant, natapos na ang kinagamo kag may yara naman sang settlement nga natabo.
Pagkatapos sang insidente, gilayon nga nagbiya ang mga pulis kag ulihi na lang nila nahibalu-an nga mga pulis ang mga nagmaoy ilabi pa nga wala man sang blotter report sa natabo nga insidente.
Samtang, nagpaathag naman si Police Lt. Col. Jonathan Pablito, hepe sang Police Station 1, kun nga-a wala sang blotter report sa insidente.
Sa interview sang Bombo Radyo kay Pablito, iya ginpahayag nga mismo ang tagreklamo nga waiter sang disco bar and restaurant ang nagdesisyon nga indi na lang magpa-blotter bangud nga indi man niya luyag nga mabalahuba ang iya identity.
Ginpahayag ni Pablito nga indi man mahimo nga pasakaan sang kaso ang tatlo ka mga pulis nga wala sang may magpangisog nga complainant.
