Nag-umpisa sa pagpangsuya sa hampang nga Mobile Legends (ML) ang away sang mag-abyan sa Sitio Sinikway, Barangay Casalsagan, Pototan, Iloilo tubtub nga naimpito ang 16-anyos nga suspek kag napatay gid ang 13-anyos nga biktima.
Ini ang sandig sa alegasyon sang suspek nga si Alias Dodoy nga amo ang iya ginsugid sa pulis sang nagsungka ini kagab-i.
Sa interview sang Bombo Radyo kay Police Major Ciriaco Esquilarga, hepe sang Pototan Municipal Police Station, iya ginpahayag sang Martes, Marso 29, pila ka oras antes natabo ang krimen, nagsugat-anay pa sanday Alias Dodoy kag ang biktima nga si Alias Raul.
Ginapahayag nga halin sa basketbolan ang biktima samtang mabakal naman sang ice ang suspek.
Suno sa pulis, naglango-lango ang duha tubtub nga nag-abot sa pagsuya sang biktima sa kay Alias Raul kag sa paghampang sini sang ML.
“Sa alegasyon sang suspect, naghalin man lang ini sa hampang nga Mobile Legends (ML). Ginsuyaan sang biktima nga mangu kuno ang suspect. Mangu kuno maghampang. Nangakig ang suspect pero asta lang kuno sa akig. Nagsige ang lango-lango kag ginduplaan kuno sang biktima ang suspect sa wala nga dulunggan samtang nagalakat sila sa dalan. Nagdalagan ang biktima palayo, kag naabtan siya sang suspect. Ginsipa ya ang biktima, natumba, kag naghilibion to ang si Alyas Raul. Naghibi kag nagdalagan sa ila nga balay (ang biktima). Nagsunod kuno ang suspect, kag sang pag-abot didto, naghambal kuno ang biktima nga ‘sulod diri kay bun-on ta ka’,” pahayag sang pulis.
Sang amo nga tion, ginapahayag nga wala nagsulod ang suspek kag nagdiretso pa sa ila nga balay nga malapit man lang sa balay sang biktima.
Sang ginabanta 2:30 na sang hapon, nagbalik si Alias Dodoy sa balay sang biktima, nag-abtanay sila, kag ginapahayag may sabtanay nga natabo.
“Nagsulod ang suspect sa balay, kag dala ya na ang martilyo kay according sa iya, nakit-an ya ang martilyo sa kusina. Sang nagsulod siya didto, ang allegation sang suspect, ginhandos siya sang biktima sang kutsilyo. Ginpektusan ya man sang martilyo ang ulo sang biktima pero hinay lang kuno. Napektusan ya na kuno pero sige pa ang handos sa iya sang biktima, kag sang ginsaylo ang martilyo sa tuo nga kamot, ginlab-ot ya ang biktima sa liog kag daw dala kuga na. Nakuga ya ang biktima, dayon ginpasundan ya pa gid lampos sang martilyo, amo to nga natumba,” suno kay Esquilarga.
Pagkatapos sang insidente, ginapahayag nga wala man nakahalin ang suspek sa ila nga balay.
Sa separado nga interview sang Bombo Radyo kay Raul Pachejo, Sr., amay sang biktima, iya ginpahayag nga madamo lang sang alibi ang suspek sang ginpamangkot ini kun diin ini sang amo nga adlaw.
Sa rekord sang mga pulis, wala naman sang iban nga malain nga hinimuan ang amo nga suspek.
Ginapahayag suod gid sila nga mag-abyan sang biktima kag ginapatihan man nga nakonsensya ini rason nga sang ulihi, nag-ako man sa iya nga pamilya kag ginsungka ini sa pulis.
Gin-turnover sang Pototan MPS si Alias Dodoy sa Department of Social Welfare and Development (DSWD).
