ILOILO CITY – Isa ka dako nga pagpanghangkat sa Commission on Elections ang pagpa-iway sa October 2018 sang barangay kag Sangguniang Kabataan (SK) elections.
Sa interview sang Bombo Radyo Iloilo, ginpahayag ni Comelec spokesman James Jimenez nga natunga ang iya reaksyon sa resulta sang caucus sang mga mamalidha sa Kamara kun sa diin nakasugtan sang mga ini ang pagpasar sang hagna para ipa-iway sa masunod nga tuig ang barangay election.
Ginpahayag ni Jimenez nga mabudlay ini para sa Comelec bangud maapektuhan ang preparasyon sang talatapan para sa 2019 automated local and national election.
Nagakabalaka suno sa opisyal ang mga election stakeholders nga maapektuhan ang focus sang Comelec bangud kinahanglan i-divert ang resources kag personnel para handaan ang eleksyon sa barangay.
Ginpahayag ni Jimenez nga all set na ang Comelec para sa eleksyon sa Oktubre kag kuntani pabay-an na lang sang Kongreso nga madayon ini agud mahatag nila ang 100 percent nga atensyon sa preparasyon sa 2019 elections.
Nahibaluan nga buwas kuntani magasugod na ang Comelec sa pag-imprinta sang mga balota para sa barangay election.